?

Log in

No account? Create an account

Аварблог

Сахлъи - магIарулазе ва гьезул гьудулзабазе!

Дагъистаналда гIетIул махI ва дезодорант
avarblog

Экономикияб форумалдагун терроралда тIасан пикраби

Рихьдае ва ххвалие гьабулеб ишалда гIурусаз абула «потемкинские дерев­ни» ралел ругин. Григорий Потемкин абулев чи вукIун вуго гIурус пача Екате­рина кIиабилелъул божарав чи. Росси­ялъ турказухъа Крымалъул рагIаллъи бахъарабго улка сверизе яхъарай па­чаялда бихьизе Потемкиница пача унеб нухлул рагIалда росабазда релъ­лъарал кагътил макеталъул минаби сокIкIунел рукIун руго. Пачагун каре­та иргадулаб бакIалде щвелалде гьелго макетал гочинарулел рукIун руго цой­ги бакIалде. Гьеб букIана тIадегIанай пача жиндир улка-ракьалдаса разилъ­изе гьабулеб хIалтIи. Гьелдаса хадуб бижана гIурусазда гьоркьоб ххвалие ва рихьдае гьабулеб хIалтIуда «потем­кинские деревни» ралел ругин абураб кици.

ГьабсагIаталда Дагъистаналда унеб буго федералияб централда бихьизе «Потемкинил росаби» раялъул хIалтIи. Амма гьеб буго нилъеего, кавказалъу­лазе, хасиятаб къагIидаялда гьабулеб. Аслияб къагIидаялда тIадчагIаз Мо­скваялъул ва гьалбадерил гIаданибе бугIулеб пикру буго гьаниб террор гу­реб, лъикIаб, парахатаб гIумру бугин абураб. Амма гьелъ дагъистаниязул гIумру лъикIлъулеб гьечIо, лъикI бу­гел ххвелал концертаздаги, фестива­лаздаги, форумаздагилъун гьаруниги. Къокъ гьабун абуни, республика гуро - тIубараб ВДНХялъул павильон буго.

Иш квеш гьечIо – кIиго чи гурони чIвачIо

ГIемерисел гIадамаз чвердон ха­дуб черхалде махI гьуинаб лъим, дезо­дорант речIчIизабула. Цо-цоязин абу­ни, чвердезе кколеб бакIалда, гIетIул махI чIвазе речIчIизабула гьеб. Амма гIемерисеб мехалда гьелъ кIиябго махI жубараб жо лъугьуна. Гьединаб асар гьабула терактазгун фестивалаз ва форумаз Дагъистаналда.

Северияб Кавказалда ихтиярал ко­досев президентасул вакил Александр Хлопониница форумалда абуна: «Се­верияб Кавказалъул республикабазда гIумру гIадатияб къагIидаялда унеб буго, ралел руго цIиял предприяти­ял», - ян.

Гьеб форум тIобитIулел къояз­даги гIадатияб ахIвал-хIал букIана. Щибниги цIияб жо букIинчIо. Радалго унеб букIана хасаб операция, гьелда цеве чIван вугоан цо полициялъулав ва ратун руго цIиял изну гьечIого яр­гъид гIуцIаразул бакIал, ярагъ. Изну гьечIого яргъид гIуцIаразе изнугун яргъид гIуцIараз гIакъубаби кьолел руго законалда данде ккечIониги. КигIан власталъ гIумру лъикIлъулеб букIин бихьизабизе хIаракат бахъани­ги, гIетIул махI тIагIине чвердечIого дезодорантал пунхъаниги гIумру лъикIлъулеб гьечIо. Нахъойги Дагъ­истаналда гIумруялъул роценлъун хутIулеб буго иргадулаб кьвагьиялъе лъураб тротилалъул къадар.

Дагъистаналъул бетIер МухIа-мадсалам МухIамадовас рикIкIунеб буго республикаялда цере ругел масъ­алаби цадахъго роцIцIине кколин: террор лъугIизабиги, инвесторал гьа­нире ахIиги. Президентасул анищазда лъилниги дагIба гьечIо, гьеб кинабго анищаллъун хутIиялде гурони.

Олимпиялъул цIадуца къезабулеб террор

«Рохьилазе» гIагараб заманалда ахир лъелин абулеб буго тIадчагIаз халкъалда. Терроралдаса нилъ бергьу­нел ругин рукIуна иргадулал рапортал - гьезул 300 чи гурони хутIун гьечIин. Амма гьелгун къеркьезе реххулезул къадар къо бахъанагIан цIикIкIунеб буго. Амма кинго бичIчIуларо рохьи­лазул къадаралда цадахъ щай къува­талъул хъулухъазул гьелгун къеркье­ялъул даража гIодобе кколеб бугебали. Щай цIикIкIунел ругел диван гьечIел къисасалги рикъулел гIадамалги. Гье­зул хIакъалъулъ цохIо рохьилаз гуреб, гIадатияб халкъалъ рагьун бицунеб буго.

МахIачхъалаялъул посталда ахи­ралда гьабураб кIудияб теракталъул хIакъалъулъ хъвалеб буго блоггераз. Гьеб посталда ругел полициялъулаз­да чанго нухалъ лъазабунин гьенир щаклъизе бачIунел гIадал машинаби ругин. Хадуб загьирлъана гьеб теракт гьабизехъин букIиналъул информа­ция полициялъулазухъе цебего щун букIин. Амма щибниги гьабун гьечIо гьеб гьукъизе.

Чачаналдаса Дагъистаналде рех­харал рагъулал къуватазда сверухъги гIемерал харбал тIиритIана Дагъиста­налда. Бищунго тIибитIараб пикру буго Владимир Путиница Сочиялъул Олимпиадаялде Кавказалъул респу­бликабазда терроралъе ахир лъеян амру кьун бугин абураб.

Кадровияб политикаялъ­улъ «Калашников»

Масала, терроралъе ва «рохьилазе» ахир лъела гьел аскараз. Щиб, гIицIго «рохьилазищ» квалквал гьабулеб бу­геб гьанире инвестициял рачIиналъе? Щибаб моцI иналде чIвалел журнали­стал, рухIиял церехъаби, тIадегIанал хъулухъчагIи – гьел чIвай-хъвеязулъги гьезул гIагарлъиялда «рохьилалищ» рихьулел ругел? ГIемерисеб мехалда гьел такъсиразул лъалкIаз тIадегIанал хъулухъчагIазул кабинетазде рачунел руго. Гьел руго тIалъиялъул масъала­би.

Дагъистаналда хъулухъчагIи ри­щулеб ва толеб алатлъун лъугьана Калашниковасул автомат. ТIалъиялда хиса-басиял лъугьунел руго гIицIго иргадулав хъулухъчи чIван тахбакI эркенлъарабго. БатIайиса тIалъиялда хиса-басиял гьарулел механизмал гьа­нир жеги хIалтIулел гьечIо. Хъулухъ­азда жакъаги руго 90 абилел соназда пачалихъ бикъа-хъамурал чагIи.

Гьезул нухмалъиялъ кепказде бичана республикаялъул магIишат жидедаго гьоркьоб. Дагъистан тун­кана къватIибе бахъизе захIматаб хьуцIилъе.

Кинаб экономика ва цебетIей лъугьинеб гьеб хьуцIилъ кьучI лъу­раб республикаялъул? Коррупци­ялъул гIорхъаби гIадан хIинкъулел гIорхъабаздаса ун руго, амма федера­лияб централда гьелъулъ кинабгIаги хIинкъи бихьулеб гьечIо. Нилъеда ракIалда бугогури МахIачхъалаялъул мэрасе Путиница кьураб суал: «Где деньги, Зин?», живго премьерас абун букIана МахIачхъалаялъе биччараб гIарцул къисмат жинда лъалин кибе арабали. ХIасил? ...

Дмитрий Медведевас хIеренго бичIчIизабулеб букIана Дагъиста­налъул президентасда хъулухъал ричиялдаса хIалтIиго лъикIин. Гье­ниса бихьулеб буго нилъеда масъала цохIо мэрасулъ ва республикаялъул бетIерасулъ гьечIеблъи. Масъала буго федералияб централъул ва регионазул гьоркьорлъабазул ва иргадулал рищи­язул урнабазулъ ратарал гьаркьазул къадаралъулъ.

Щиб цIикIкIунеб бугеб Дагъистаналда?

Монополиялда данде чIараб хъу­лухъалъ (ФАС) судалде гIарза битIун букIана промышленносталъул, энер­гетикаялъул ва бухьеналъул министр хъулухъалдаса ватIа гьавизе ккеялда хурхун. Аслияб гIайиб министрасде гIунтIизабун букIана газ бачиналъул тендеразда пачалихъалъул гуреб кIиго фирма гIахьаллъизе тунгутIиялъ. Кон­тракт хъван буго живго бетIергьанаб фирмаялъулгун. Законалда рекъон, судалъ хъулухъалдаса эркен гьавизе кколаан министр. Амма нилъер гьа­нир хIукмаби къотIула гIицIго судияс­да бичIчIулеб «ритIухълъиялъул» нух­да. 12 азарго гъурущ гIакIаги къотIун тана министр. Нужеца гьикъила – рес бугищ гьел чиновниказулгун бизнес гьабизе? - ян. Буго. Гьеб бизнесалъул бетIергьаби жалго чиновникал ру­гони. Гьединлъидал Дагъистаналда цIикIкIунеб буго чиновниказул къа­дар.

Инвестициялги цIикIкIунел руго.

Терроризмалда къеркьолезул къа­дар – щибаб къоялъ.

Коррупциягун къеркьей – цIоб гьечIого.

ЦохIо дагьлъулеб жо буго эрке­наб пикруялъул, лъикIал къасдазул, ритIухъаб хасияталъул ва бихьинаб гIамалалъул дагъистаниязул къадар.

Лъиеха гьелъул ургъел бугеб?

«Миллат», 23, 2012с


Твиттералдаги щванаха ;-)
avarblog
Твиттерин абулеб микроблогги бачине байбихьана.
Гьале ссылкаги: http://twitter.com/#!/avartwit

Нилъее щолеб буго тротил
avarblog

Ахирисеб теракталъ цо батIияб рахIатхвей лъугьана МахIачхъалаялда. Жал цIунун рукIиналда божилъи хвеза­буна гьелъ гIадамазулъ. БичIчIизе захIматаб хIинкъиялъ цIезабуна кинабго сверухълъи.

АхIвал-хIал хIалуцинабулеб буго гIадамазда гьоркьор тIиритIулел харбазги. Бицунеб буго лъабабилеб теракталъ­улги - жийго кьвагьизе къачIалей цоги гIаданалъул бицу­неб буго къуваталъул идарабаз: киналго хIинкъулел руго Каспийскалдаго гIадинаб 9 абилеб май такрарлъиялдаса. Дагъистан тун гочун иналъул пикраби тIадеги щулалъулел руго.

Кида гьаб лъугIилеб?

Экзаменалда мугIалималъ киназего лъикIал къиматал лъуна. Теракт гьабураб сордоялъ гьелъул гIагарав чи вукIун вуго гьеб бакIалда. «Щибниги лъугьинчIо»,- ян бицунеб букIана гьелъ, зачеткаялда гъулбас гьабулаго.

Лъукъарал гIадамал ругеб больницаялдаса рокъове дун вачарав херав таксистас дихъа гIарац босичIо: «ЦIуне дуца мунго, гIолохъанчи!» - янги абун виччана.

Редакциялда киназго бицунеб буго теракталъул. Жеги теракталъе ругел гIиллабазул, щай гьедин кколеб буго абу­рал суалал ва Аллагьасде хьулалда руго киналго. Лъицаниги абулеб гьечIо кинабго лъикI букIине бугилан. Киназго абу­леб буго «кида гьалъие ахир букIине бугеб?» абун. Теракт гьабун кIиабилеб къоялъ МахIачхъалаялъул цо районалда ва аскIоб бугеб Хъумторхъала районалда спецоперациял унел руго. Дагьалъ хадуб спортсменасул машина кьвагьи­забуна. Гьаб киданиги лъугIизе гьечIилан кколеб буго.

Цойги кьвагьиял – терактал гурищ?

Теракталда хваразул хъизаназе цо-цо миллион гъурущ, лъукъаразе батIи-батIияб къадаралда гIарац кьолеб буго. Амма гьеб гIарац щиб кколеб гIагарлъи хвараб къварилъи­ялда ва хIинкъиялда данде? ГIарацги кьолеб буго гьеб те­ракт хутIарал цогидазда данде бищунго кIудияб букIун. КигIан рукIарал ахираб заманалда чIварал ва кьвагьарал, чан лъукъарал – гьезул гIумруялъул къимат гIарцудалъун борцинчIо. Тротилалдалъун гурони.

Мисалалъе, Великобританиялда теракталъул хIа-силалда чIваразул хъизамазе ва лъукъаразе материали­яб ва психологияб кумек тIубанго пачалихъалъ гьабула. Дагъистаналда гьединаб лъугьа-бахъин цIакъго къанагIат букIине бегьула. Щайгурелъул, Россиялъул законазда рекъон, гьеб гIарац кьезе ккола жинца теракт гьабурас. ГIемерисеб мехалъ гьединал чагIи чIаго кодоре щоларо, киналго чIвала. Щаклъи буго 3 маялда теракт гьабура­зе судалъ тамихI къотIиялда. Гьезул цIарал рехсеялдаги гIажаиблъи гьабизе бачIуна. Боевикал цере чIвала ва хадуб бицуна гьез гьарурал такъсиразул.

Терактлъун рикIкIунаро Дагъистаналда щибаб кьва­гьиги. Щайгурелъул гьеб мехалъ гIайиб бугел ралагьизеги гьездаса гIарац тIалаб гьабизеги ккола. Жидерго махщел­цоял чIванигицин полициялъулаз гьезда «терактин» абу­ларо, «покушениеян» гурони. Гьеб статьяялда рекъон гьез­даса хIалтIиги дагь тIалаб гьабула.

Рашид НургIалиевасе «За заслуги перед Отечеством» абураб шапакъатги гьесул хIалтIухъаби лъикIго хIалтIун кьураб батизе буго.

РитIухълъи гьечIо кинабгIаги. Террористазе гIарац щолеб буго (Западалдаса, Востокалдаса, бакIалъул чинов­никазухъа ва бизнесменазухъа). Гьезда данде къеркьолезе щолел руго шапакъатал.

Нилъее щолеб буго тротил.


Щивлъун ва кинавлъун вукIинев?
avarblog

«Щивлъун вукIинев?» ва «Кинавлъун вукIинев?» абурал суалал жакъасеб Дагъистаналда жаваб батичIого халат рахъун хутIуларо. Мисалал гIунги тIокI руго. Амма суал буго гьездаса кинал тIаса рищилел абураб. Нилъеда лъала дагьабниги тарбия щварав гIадатияв магIарулас пикру гьабила инсанлъун, лъикIав чилъун вукIине. Амма нилъеца гIумру гьабулеб буго къуваталъе бетIер къулулеб ва чиясул адаб цIуни загIиплъилъун къабул гьабулеб халкъалда гъорлъ, кIиабилеб – нилъеца гIумру гьабулеб буго гIолилаз мисал цIакъго къабихIал ва хIалихьатал церехъабаздаса босулеб заманалда. Бокьарав гIолохъанчиясе суал кье, дуда гIелмияб сфераялдаса кинал цIарал лъалел абун, бетIер къотIизе кьезе кIола - цониги цIар рехселаро.

Щайгурелъул нилъер налогаздаса гIуцIараб гIарацги бикъун, тIадчагIаз рукъзал кьола рингалда дандияв гIодов ккезавиялъухъ, яги кIвар бугеб, турниралда гьабураб «проход в ноги» кIодо гьабун. Амма гIелмуялъе тIубараб гIумруги  кьурал, чара гьечIого гIаламалъе хIажатал ва кIвар бугел цIех-рехалги тIоритIулел гIалимзабазе гьабулеб хъулухъ хутIула иргадулал баркиязда ва  бюджет бикъулев чиновникас кьураб грамотаялдалъун.

ГьабсагIаталда гIун бачIунеб гIел буго цIодораб ва хехго гIумруялъул шартIазда гъорлъе лъугьун бажарулеб. Гьез гIумруялда бищулеб нух ва гIалам унеб бакI бараб буго тIалъиялда ва церехъабазда. Кинаб бугеб жакъасеб Дагъистаналда хIакъикъат? Цо нух - кIудияб спорталде, кIиабилеб нух – политикаялде букIине рес буго. Кинаб нухмалъи дур букIинеб «левый хукалъул» ва «проход в ногиялъул» гIелмуялдаса батIияб бакIалде ваккичIев чиясул? Гьеб суал я тIад ругез, я халкъалъ кандидатасда цебе лъоларо, аслияб жо буго гьесие бюджеталъул рогIразул кIалтIе ворчIи. Гьеб бикьа-къотIизе кIудияб гIелмуги хIажалъуларо. Бигьаяб ва хехго гIарац бачIунеб хъулухъалде ишан ва гьелда сверухъ къеркьей буго жакъасел дагъистаниязе гIумруялъул магIналъун лъугьун. Щив вугев жакъа халкъалда лъалев ва вихьулеб бакIалде вахарав чи. Политикалин цIар бугел гIадамал, бидуца белъараб нухда тIараде рачIарал ва жидерго тахбакI цIуниялъе гIоло гIалам гъуризе нахъе къалареб халкъ. Рохьазда ругел диниял фанатикал, жидеца чIварал полициялъулазул къадаралдалъун къадру къваригIарал, гIундулгун къалал рекарал спортсменал, дандиясда бичIчIулеб хIалалъ пикру загьир гьабизе гIураб гIакълугун лъай гьечIеб къавм. Я гIалимчи, я хIалтIухъан, я гIелму цIалулев, я боцIи хьихьулев чиясул къимат халкъалда гьоркьоб гьечIо.

Криминалиял, диниялгун экстремистиял политикаялъул церехъаби (гIемерисеб мехалда гьел цохIого чагIи рукIуна) халкъалъе мисаллъун ругеб ракьалъул букIинесеб кьерхараб буго. Гьелъ ратила нилъер къватIазда къо бахъанагIан цIикIкIунел руго спортивияб форма ретIарал гIолилал, гIундул рекарал ва къалал гьетIарал церехъаби.

Университеталъул преподавателас абухъе, къанагIат дандчIвала гIелмуялъулгун лъаялъул дангъваялъ гьурмал хисизарураб гIел жакъа Дагъистаналда.


Дун хвасар гьавуна «Черновик» газета къватIибе биччазе лъугьиналъ…
avarblog

Жакъа «Миллаталъухъ» гьоболлъухъ вуго ГIалисултан ГъазимухIамадов. Республикаялъул лъугьа – бахъиназдаги, политикияб ва жамгIияб гIумруялдаги хадуб халкколел, гIелму цIаларал ва лъай бугел магIарулазда бичIчIун батила лъил рахъалъ бицунеб бугебали. Ратила ГIалисултан лъа­ларел гIадамалги, гьел руго цIалдоларел гIадамал. Киназдаго лъалевлъун чи Дагъистаналда лъугьуна Олимпиадаялда чемпионлъун вахъарабгоги, теле­визоралдасан, газетаздасан горбода галстукги да­лун, кIвар бугел хIакимазул горсвериялда гьоркьов паркъулеб мехалдаги. ГIалисултан вуго рагIдукьги чIун, ахираб анцIила щуго соналъ Дагъистанал­да бугеб тIекълъиялъулги, бюджет бикъиялъулги, чIвай – хъвеялъулги хIакъалъулъ рагьун абулев, «Аваристан» ва «Дагестанцы» газетаздаса гьелъул хIакъалъулъ гIемер хъварав чи. Гьес гIуцIанин аби­зе бегьула тIоцебесеб жибго жиндаго чIараб ва хал­къалъул мурадал цIунараб газета. Цебеккун цойги гьединаб газета букIанин абизеги захIмат буго. Гьеб киналдаго тIасан «Миллаталъул» суалазе жавабал кьолел руго «Дагестанцы» газеталъул бетIерав ре­дактор ГIалисултан ГъазимухIамадовас.

- ГIалисултан, кин вачIарав мун «Дагестан­цы» газета гIуцIиялде, щиб къваригIун, яги щиб гIоларого, ялъуни дур пикруялъе гIорхъичIвайищ букIараб прессаялда мунго бетIергьанал басмаби ра­гьиялъе?

- Доб букIана ункъоялда анцIабилел соназул ахир, цIакъ санагIат гьечIеб хIалалда букIана авар миллат. Жакъаги абизе кIоларо гьелъул иш лъикI бугилан. Гьедин биччазе байбихьана «Аваристан» абураб газета.

Цо нухалда гьениб дицаги ХIусенов МухIамадицаги (Алазани) хъвана «ЧIаго ругищ нуж, магIарулал?» абураб макъала. Гьенир рорхарал суа­лазда тIад ургъизе кколеб бакIалда магIарулазул хIакимзабацаги цо–цо хIакимлъиялде хиял лъураб агь­луялъги Госсоветалда хас гьабун гIуцIараб данделъиялда нижеде гъвел бана, амма нижер пикру цIехезе, яги мухIканаб цIех-рех гьабизе хIалцин бихьичIо. БитIахъе, «чIван лъун рата­на» гьенир ниж, нижер пикрабахъги гIенеккичIого. Аслияб хъуй гьабуна жиндир мунагьал чураяв ГIабашилов ХIажица. Гьес хъвана «Лжерадете­ли моего народа» абураб макъа­ла. Гьев гъаримас нижеца хъвараб жо цIалунцин гьечIоан. КъваригIун букIун буго ХъахIаб рокъор ругезда нужеца ниж хьихьи гIадада гьечIин, авар халкъги лъикI бугин, гьадинал «магIна гьечIел» суалал рорхулезе жа­вабги нижеца гьадин кьварун кьелин абун бихьизабизе. Макъалаялда хъва­раб жоги мекъи бичIчIизабун батана доба. Амма кигIан хIаракат бахъани­ги, «Аваристан» газета жибго жиндаго чIараб даражаялде бахинабизе кIвечIо: кигIан гIадамазе хIажатаб бугониги, гьеб къинабуна районазул админи­страциязул нухмалъулез ва почалъул районазда ругел гIуцIабазул началь­никзабаз, бер къанщун ва намус-яхI тун «ХIакъикъат» газеталъул гурони, подписка гьабунгутIиялъ.

Гъолдаса хадув газета цIалулезул къадар цIикIкIинабиялъул мурадалда вачIана дун гIурус мацIалда «Дагестан­цы» газета биччаялде: «гIабашиловал» перевод гьабизе тIамичIого, хъулухъ­азда ругездаги гIакълу-пикру бугел гIадамаздаги дагъистаниязулги, гьез­даго гьоркьоб аваразулги проблемаби рагьизе хьулгун.


кинабго гара-чIвари ц1ализе бокьун батани, гьаб ссылка мерхье гIонкIочалъ!Collapse )


Сулайман Уладиев: «Хиса – басиязул заманалда загьирлъула аварал»
avarblog

АрбагI къоялъул бакъанида, цебехун нижеца хъван букIахъе, «Миллат» газеталъухъ гьобол­лъухъ вукIана машгьурав политикияв ва жамгIи-яв хIаракатчи Сулайман Уладиев. ЧIамучIал церерагIиялги тун, бачIинахъего абила, Сулайма­нилгун нижер гара-чIвариялъе, гIурусаз абухъе, кинабгIаги «информационный повод» абураб жо букIинчIо. «Миллаталъул» редколлегиялъ хIукму гьабуна жакъа республикаялда лъугьа – бахъунеб ахIвал –хIалалда тIаса гара – чIвариялде ахIизе гIалимчи, политолог ва кинабго лъугьа – бахъу­нелъе къимат кьун бажарулев эксперт Сулайман Уладиев.

Политикияб хIухьбахъи ва цIияб пачалихъ

- Сулайман, дуца цIакъ «хIухьел ккуна» ахираб заманалда. ГIилла букIунищ, ялъуни гьеб полити­кияб тактикайищ (дуца абулелде кIвар буссинабу­лелъул дагъистанияз)?

- КиналгIаги политикиял хIаял, тактика гьениб гьечIо. Дун вукIана гьаниса гочун инин, унги вукIана республика­ялдаса нахъе. Гьаниб парахалъи гьечIолъиги, рагъ – кьал­ги букIун гьелдаса хIинкъун гуро, цо – цо мехалда властал­дасаги, гIадамаздасаги, кигIан дуца хIаракат бахъаниги хисизабизе кIолеб жо бихьунгутIиялдасаги ракI буссуна. Гьединаб хIалалде ккун вукIана, Эмиратазде ун вукIана хасало дирго лъималазухъе, моцIидасаги мехги бана гье­ниб. Цо дирго хъвай-хъвагIаязде, аралъул хIасилалги, букIинеселъул хIисабалги гьаризе тIамуна гьелъ. Араб со­налъ къо гьоркьоб бахъичIого чIвалел гIадамазулги, дагъи­станияз кинаб рахъалдаса батаниги тIолел биязулги хIисаб гьабун, гIемераб хIалтIи гьабуна гьеб ишалъе ахир лъеялъе гIоло къеркьолаго. ЖамгIиял гIуцIабиги гьаруна, данделъ­абиги ахIана, Россиялъул НАКалъул генералаздаса рахъа­рал ихтиярал цIуниялъул хIаракатчагIи Федотов, Людмила Алексеева, Николай Сванидзе ва цогидалги гъорлъе рачун, Дагъистаналда динияб дандечIеялъул кIиго рахъ – суфи­ялги салафиталги цо столалда нахъа чIезарун, кIудияб хIалтIи гьабуна биял тIеялъе ахир лъеялъе.


кинабго макъала цIале гьаб ссылкаги г1онк1очица мерхьунCollapse )


Бичас бичани, пост)))
avarblog
Гьагъаб рестартилан абураб жоялъулги жо ккеч1илан кколеб буго) Щиб гьабилеб, гьудулзаби, г1умру гьедиг1ан г1адатаб жо бук1ун гьеч1елъул. Дирго г1антал пикраби загьир гьарулеб г1урус мац1алъ бачунеб блог бук1аниги, гьаб маг1арул мац1алъ бачунебги тезе бокьун гьеч1о. Гьединлъидал дирго гьайбатал пикрабиги гьанирги лъела.
Бат1аго ц1ияб жоги г1умрудалъ кколеб гьеч1о, цох1о гьагъаб университетилан абураб бугеб лъайгиялдаса рак1 буссинабулеб бак1алда ине ккеялъ татуги хвезабун вуго ахираб заманалъ. Уха, дипломха бокьун бугеб. Диени гьеб расниги х1ажат гьеч1о, амма инсуе къвариг1унарищ цадахъгьекъолезда цебе реццалъе "Дир васасул огьогьояб диплом буго" -ян абизе. Т1аса лъугьа, дада, амма гьеб дипломалда т1ад баг1араб т1анк1ни бук1инаро, амма мун рази вук1ина дир бордо-кьералъулаб цогидаб гьайбатаб документ бихьани - г1олилазул парламенталъул депутатха дун вугев гьанже))) Г1арац кьолеб бук1ани гьелъухъ жеги дунгоцин вохулев вук1инаан.
Цойги щибдай бицинеб нужее. Валагьги, заман г1олеб гьеч1о х1алт1изе. Хасго кваназеги кьижизеги заман г1олеб гьеч1олъиялъ ц1акъго тату хун буго. Гьелдалъун тела. Бат1аго гьал г1ахьуч1ал ц1алулел чаг1иги ратиларин.

Ма нужее цо кополаб видеоги:


Restart (хъван батани)
avarblog
Гьаб блог гьадин рехун тезехъин ракIалдани букIинчIо, амма гъалатI кканаха. Гьанир раккулелгIаги рукIаралдай щалниги? РукIинчIелъиялда щаклъигIаги гьечIоха)))
ГIурус мацIалда бачунеб блогалдани жиб-жиб къоялъ хъвай-хъвагIаял гьаризе хIаракат бахъула. Гьанибги мех-мехалдаса ваккизеги ккела. РакIалда буго анкьида жаниб лъабгогIаги нухалъ гьанир постал лъезе. Квербакъайгиха;-)

Цо-кIиго жо гIаги хъван телин
avarblog

Фонетикиялъулаб абундач

РагIана гьаб лъугьа-бахъин цо чIарадисесул хъизаналда лъугьанилан.
РукIун руго гьал чай ххулел. ГитIинав МухIамадица халат бахъун «гьорррр-гьорррр»-илан ххулеб букIун буго чай. Эбелалъ цинги бахъун васасде абун рагIула:

- Я дир вас, МухIамад! Дур гьеб ххуялъул халалъи гIаги щиб!

 

* * *

ЦIияб аби

Ва бана гIазу ва биана сразу.


ГIирбанил ХIажиявас цIалулел руго жиндирго цIиял кучIдул
avarblog
ГIирбанил ХIажияв магIарулазул поэт. Поэтни щиб, цо-цояз (гьай дунги гьезда гъорлъ унвеха) гьев генийлъун рикIуна.